 UITVOER VAN VOLSTRUISVLEIS HERVAT2 November 2006
"Die hoogseisoen vir verbruik van volstruisvleis in Europa het sopas begin en
daarom is die Suid-Afrikaanse volstruisbedryf dankbaar dat die verbod op die
uitvoer van hierdie gesogte, gesonde rooivleis uit Suid-Afrika van 1 November
af opgehef is", sê Anton Kruger, die Hoof Uitvoerende Beampte van die
Suid-Afrikaanse Volstruisbesigheidskamer.
Suid-Afrika lewer sowat 70% van die wêreld se volstruise en volstruisprodukte
en voer 90% van die produksie uit. Die uitvoerverbod wat vir sowat drie maande
gegeld het nadat die nie-gevaarlike H5N2 voëlgriepvirus op 'n plaas in die
Wes-Kaap gevind is, het gelei tot die instelling van die verbod; soos wat
vereis word deur internasionale voorskrifte.
Na deeglike monitering, hertoetsing, verfyning van naspeurbaarheidstelsels en
bio-sekuriteitsmaatreëls op plase in 'n proses waar die SA Volstruisbesigheidskamer
in vennootskap met die Nasionale– en Wes-Kaapse Departemente van Landbou gewerk het,
het die Europese Unie aangekondig dat vleisuitvoere, onder sekere omstandighede,
hervat kan word. Die vereiste is dat alle volstruise 28 dae voor slagting vir Avian
Influenza getoets word. Die SAVBK bedank dan ook graag die departemente en
amptenare hiervoor.
Kruger het verder gesê dat Suid-Afrikaanse verbruikers nie bekommerd hoef te wees
dat volstruisvleis nie meer in Suid-Afrika beskikbaar gaan wees nie. " Ons het die
afgelope paar jaar 'n lojale Suid-Afrikaanse mark geskep wat steeds groei soos
verbruikers die waarde en voordele van volstruisvleis besef en sal steeds voortgaan
om hoë gehalte vleis aan die binnelandse mark te voorsien".
Source: Suid Afrikaanse Volstruis Besigheids Kamer 
|
